ताप्लेजुङको पाथीभरा मन्दिर क्षेत्रमा केबलकार बनाउन नदिने समूह र प्रहरीबीच आइतबार पनि झडप भएको छ । झडपमा क्रममा दुवै तर्फका गरी दर्जनौं घाइते भएका छन् ।
आन्दोलनकारी तर्फ ५५ जना घाइते भएको दाबी गरिएको छ । प्रहरीको गोली लागेर सख्त घाइते भएका दुईजना आन्दोलनकारीलाई विराटनगरस्थित नोबेल अस्पताल रेफर गरिएको छ । आन्दोलनकारीतर्फ चारजना सख्त घाइते छन् ।
ताप्लेजुङका प्रमुख जिल्ला अधिकारी नेत्रप्रसाद शर्माका अनुसार आन्दोलनकारीको ढुंगा प्रहारबाट प्रहरीतर्फ २० जना घाइते भएका छन् । जसमध्ये प्रहरी कमान्डर (प्रहरी निरीक्षक) रोहित शर्मा सख्त घाइते भएका छन् ।
उनको ताप्लेजुङ जिल्ला अस्पतालमा उपचार भइरहेको प्रजिअ शर्माले बताए । प्रहरीले फायर खोलेपछि आन्दोलनकारीहरू खुकुरी तथा घरेलु हतियार लिएर प्रतिकारमा उत्रेका थिए ।
पाथीभरा क्षेत्रमा केबलकार बनाउन हुँदैन भन्ने पक्षधर र प्रहरीबीच काफ्लेपाटीभन्दा एक किलोमिटरमाथि रहेको बलुडाँडामा झडप भएको हो । शनिबार पनि पटक-पटक झडप भएको थियो । केबलकार निर्माण प्रक्रिया अघि बढाएदेखि त्यहाँ विरोध सुरु भएको हो ।
