कालीकोट, माघ २८ :
सुक्खा पहिरोले कर्णाली करिडोर अवरुद्ध भएको छ । आइतबार बिहान ८ बजे सुक्खा पहिरो खस्दा सडक अवरुद्ध भएको हो ।
सडक अवरुद्ध भएसँगै हुम्लाको सदरमुकाम जाने र सर्केगाड आउने यात्रु तथा मालवाहक गाडीसहित सम्पूर्ण यातायातका साधनहरु बाटैमा रोकिएको प्रहरीले जनाएको छ ।
यातायाताका साधनहरु ठप्प भएपछि सर्वसाधारण हिँडेरै यात्रा गर्न बाध्य भएका छन् ।
सर्केगाड गाउँपालिका १ को खच्चामा माथिबाट सुक्खा पहिरो आएर करिब २० मिटर सडक पूर्ण रुपमा छोपिएको छ । सडक डिभिजन कार्यालयको पहलमा जेसीबीले बाटो खुलाउने प्रयास भइरहेको छ ।
