उपप्रधानमन्त्री एवं सहरी विकासमन्त्री प्रकाशमान सिंहले तत्काल निर्णय गर्न सक्ने क्षमता विकासका लागि खेलकुदको भूमिका महत्त्वपूर्ण हुने बताएका छन् ।
नेपाल चार्टर्ड एकाउन्टेन्ट स्टुडेन्ट एसोसिएसनको आयोजनामा आइतबार सुरु भएको टी-ट्वेन्टी क्रिकेट प्रतियोगिताको उद्घाटन गर्दै उनले यस्तो बताए । उनले युवाहरूलाई समनजसँग एकाकार हुन खेलले सघाउ पुग्ने भन्दै उनले विद्यार्थीले अध्ययनसँगै अतिरिक्त क्रियाकलापमा पनि ध्यान दिनुपर्ने बताए ।
‘खेलकुदले खेलाडीको स्वास्थ्य त राम्रो हुन्छ नै । तत्काल निर्णय गर्ने क्षमता पनि विकास हुन्छ । अनुशासनको विकासकका लागि पनि खेलकुदको धेरै महत्त्व छ,’ उनले भने । आफ्नो बेलामा करातेको क्रेज रहेको भन्दै त्यसपछि फुटबल र अहिले क्रिकेटको क्रेज रहेको पनि उनले बताए ।
खेलाडीको क्षमता विकास गर्दै राष्ट्रिय खेलाडी उत्पादनका लागि पनि यस्ता प्रतिस्पर्धाहरू आवश्यक रहेको भन्दै उनले टी-ट्वेन्टी क्रिकेट प्रतियोगिता सफलताको शुभकामना व्यक्त गरे ।
