स्वयम्भूको विश्व सम्पदा सूचीमा सूचीकृत प्रतापपुर र अनन्तपुर मन्दिरको जीर्णोद्धार हालै सम्पन्न भएको छ। स्वयम्भू व्यवस्थापन तथा संरक्षण महासमितिले मन्दिरको जीर्णोद्धारको काम एक वर्षमा पूरा गरेको हो।
मन्दिरको संरचनामा भूकम्पका कारण आएको क्षति पछि यसका जीर्णोद्धारका लागि पुरातत्व विभागले पुरानै स्वरूपमा मर्मत गर्ने अनुमति दिएको थियो।
महासमितिका सचिव चन्द्ररत्न बुद्धाचार्यका अनुसार, नयाँ प्रविधिको प्रयोग गरी मर्मतसम्भार र रंगरोगनको काम पनि सम्पन्न गरिएको छ।
यी मन्दिरहरूको ऐतिहासिक र पुरातात्विक महत्त्व छ, र ती राजा प्रताप मल्लले निर्माण गरेका थिए। प्रतापपुर मन्दिरलाई राजा प्रताप मल्लको नाममा राखिएको हो भने, अनन्तपुर मन्दिर रानी अनन्तप्रियाको सम्झनामा निर्माण गरिएको हो।
महासमितिले यसका साथै स्वयम्भू क्षेत्रको जङ्गल संरक्षणका लागि विरुवा रोप्न र पार्कको सजावटका काम पनि गरिरहेको छ। इञ्जिनियर राजेश सुवालका अनुसार, यो मन्दिरको जीर्णोद्धारमा करिब २० लाख रुपैयाँ खर्च भएको छ । महाचैत्य आसपासका अन्य सम्पदाहरूको मर्मतका लागि अध्ययन भइरहेको जनाइएको छ।
