स्वतन्त्र सांसद अमरेशकुमार सिंहले स्वास्थ्यमन्त्री प्रदीप पौडेललाई तत्काल बर्खास्त गर्न प्रधानमन्त्रीलाई आग्रह गरेका छन् ।
प्रतिनिधिसभाको बिहीबारको बैठकमा उनले वरिष्ठतम् अधिकारीलाई पाखा लगाएर कनिष्ठलाई स्वास्थ्य सचिव बनाएको भन्दै मन्त्री पौडेलको राजीनामा माग गरेका हुन् ।
स्वास्थ्यमन्त्रीले मन्त्रालयका वरिष्ठ सहसचिव डा. संगिता मिश्रलाई सचिवमा बढुवा नगरी संविधान च्यात्ने काम गरेको आरोप पनि लगाए । सांसद सिंहले डा. मिश्रसँग आफ्नो कुनै चिनजान नभए पनि उनी मधेसीको आस्थाको प्रतीक भएको बताए । ‘संगिता मिश्रको गल्ती मधेसमा जन्मिनु थियो कि महिला भएर ?’ सभामुखलाई सम्बोधन गर्दै संसद्मा सिंहले प्रश्न गरे ।
कुलमानलाई जस्तै डा. मिश्रलाई पनि सरकारले त्यस्तै व्यवहार भन्दै सिंहले स्वास्थ्यमन्त्रीको राजीनामा मागे । साथै उनले प्रधानमन्त्रीले तत्काल स्वास्थ्यमन्त्रीलाई बर्खास्त गर्न संसद्मार्फत ध्यानाकर्षण पनि गराए । उनले भने, ‘स्वास्थ्यमन्त्री मैले पढाएको विद्यार्थी हो । तर, उहाँले भन्नुभएको छ कि यो मन्त्रालयमा कुनै शाखामा प्रमुख भएर मधेसी रहँदैन, मलाई सरकारप्रति शंका छ।’
उनले यही कांग्रेस-एमालेको सरकारले माघ १९ को घटना गरेको गम्भीर आरोप पनि लगाए । फेरि प्रतिगमनकारीसँग मिलेर मधेसी,दलित, जनजाति र महिलाहरुलाई संविधानको समावेशी सिद्धान्तलाई च्यात्दै, कुल्चदै एकल जाति, एकल समुदायको नेतृत्व गर्न खोजेर प्रतिगमन आह्वान गर्न खोजेको भन्दै आक्रोश व्यक्त गरे ।
मन्त्रिपरिषद्को हिजो (बुधबार) को बैठकले डा. विकास देवकोटालाई स्वास्थ्य सचिवमा नियुक्ति गरेको थियो । सिफारिस समितिले डा. देवकोटासहित स्वास्थ्य मन्त्रालयमा १२औं तहमा रहेकी डा. संगिता मिश्र र डा. टंक बाराकोटीको नाम सिफारिस गरेको थियो ।
