रुसी राष्ट्रपति भ्लादिमिर पुटिनले कुर्स्क क्षेत्रको भ्रमण गरेका छन् । रुस-युक्रेन युद्ध सुरु भएपछि यो उनको यस क्षेत्रमा पहिलो भ्रमण हो ।
रुसका प्रमुख जनरल स्टाफले यस क्षेत्रको ११ सय वर्ग किलोमिटर भूमि युक्रेनी कब्जाबाट मुक्त भएको बताएका छन् ।
रुसी मिडिया रिपोर्टका अनुसार आफ्नो भ्रमणको क्रममा पुटिनले आफ्नो सेनालाई कुर्स्क क्षेत्रलाई ‘पूर्ण रूपमा मुक्त’ गर्न आग्रह गरेका छन् ।
युक्रेनले अगस्त २०२४ मा रुसको कुर्स्क क्षेत्रमा आक्रमण गर्यो र ठूलो क्षेत्र कब्जा गर्यो । त्यसपछि रुसले यहाँबाट हजारौं मानिसलाई बाहिर निकाल्यो ।
युक्रेनी राष्ट्रपति भोलोदिमिर जेलेन्स्कीले कुर्स्कको युद्धले बफर जोन सिर्जना गरेको र पूर्वी युक्रेनमा रूसी सेनाको तैनाथीलाई रोकेको बताएका थिए ।
हालैका समयमा, रुसले कुर्स्क क्षेत्रमा आफ्नो भूमि फिर्ता लिइरहेको रिपोर्टहरू बाहिर आएका छन् ।
यसैबीच, ट्रम्पका विशेष दूत युद्धविरामको बारेमा वार्ता गर्न चाँडै मस्को पुग्ने तयारीमा छन् । यद्यपि, अमेरिकी प्रस्तावमा पुटिनबाट अहिलेसम्म कुनै प्रतिक्रिया आएको छैन ।
यसअघि साउदी अरेबियामा भएको वार्तापछि युक्रेनले ३० दिनको तत्काल युद्धविरामको अमेरिकी प्रस्तावमा सहमति जनाएको छ । ट्रम्पले अब रुसलाई पनि त्यसका लागि मनाउन खोजिरहेका छन् । -बीबीसी
.jpg)
