बाँकेको डुडुवामा रहेको जयेन्दु बाल सुधारगृहमा झडप भएको छ । झडप हुँदा ६ जना बालबन्दी घाइते भएका छन् ।
५० जनाभन्दा बढी बालबन्दीलाई प्रहरीले नियन्त्रणमा लिएको छ । सुधारगृहमा रहेका दुई समूहबीच झडप हुँदा त्यहाँ तनाव उत्पन्न भएको प्रहरीले जनाएको छ ।
झडपका क्रममा बाल सुधारगृहको दोस्रो तलामा आगजनी गरिएको थियो । आगजनीबाट भवनका सामान जलेर नष्ट भएको छ ।
बालबन्दीहरूले ढुंगा प्रहारबाट केही प्रहरी पनि घाइते भएका छन् । ठुलो संख्यामा नेपाल प्रहरी र सशस्त्र प्रहरीको टोली सुधारगृहमा प्रवेश गरेर उनीहरूलाई नियन्त्रणमा लिन सफल भएको प्रहरी प्रमुख एसपी तुलबहादुर कार्कीले जानकारी दिए ।
पक्राउ गरिएका ५० जनाभन्दा बढी बालबन्दीलाई प्रहरीले आफ्नो नियन्त्रणमा राखिएको छ । केही बालबन्दी भाग्न सफल भएका छन् । भागेकाहरूको खोजी भइरहेको प्रहरीले जनाएको छ । झडपको विस्तृत कारण खुल्न सकेको छैन ।
त्यस सुधारगृहमा अहिले २५० बालबन्दी छन् । यहाँ पटक-पटक झडपको घटना हुने गरेको प्रहरीले बताएको छ ।
