नेपाल विद्यार्थी संघ (नेविसंघ) ले आफ्नो केन्द्रीय कार्यालयको लेटर प्याड, छाप र केन्द्रीय अध्यक्षको हस्ताक्षर दुरुपयोग भएको भन्दै गम्भीर आपत्ति जनाउँदै कानुनी कारवाही गर्ने चेतावनी दिएको छ।
आइतबार जारी गरेको विज्ञप्तिमा, नेविसंघले केन्द्रीय सदस्य र क्याम्पस इकाई अध्यक्षहरूको मनोनयनमा उक्त दुरुपयोग गरिएको जानकारी दिएको हो। यसरी मनोनयन गरिएको जिम्मेवारीबारे चाँडै आधिकारिक सूचना जारी गरिने पनि संघले स्पष्ट पारेको छ।
नेविसंघका मुख्य सचिव विजय खड्काले विज्ञप्तिमा भनेका छन्, ‘संघलाई बदनाम गर्ने उद्देश्यले यो दुरुपयोग गरिएको हो। यसमा संलग्नलाई कानुनी दायरामा ल्याइनेछ।’
संघले स्वतन्त्र विद्यार्थी युनियनको निर्वाचनका दौरान रिक्त स्थानमा भएका मनोनयनहरूको आधिकारिक सूचना केवल संघको वेबसाइट र फेसबुक पेजमार्फत मात्र सार्वजनिक गरिने बताएको छ। यसले सबैलाई भ्रामक सूचनाबाट जोगिन आग्रह गरेको छ।
