प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच थाइल्यान्डमा भेटवार्ता हुने भएको छ ।
बहुक्षेत्रीय प्राविधिक तथा आर्थिक सहयोगका बंगालको खाडीको प्रयास (बिम्स्टेक)को छैटौं शिखर सम्मेलनमा भाग लिन गएका बखत दुई छिमेकी देशका प्रधानमन्त्रीबीच भेट हुन लागेको हो । उनीहरुबीच शुक्रबार साइडलाइन वार्ता हुने परराष्ट्र मन्त्रालय स्रोतले जनाएको छ ।
प्रधानमन्त्री ओलीले शुक्रबारको भेटमा मोदीलाई सगरमाथा संवादमा सहभागिताका लागि अनुरोध गर्ने अपेक्षा गरिएको छ । साथै ओलीको बहुप्रतिक्षित भारत भ्रमणबारे पनि कुरा उठ्न सक्ने अनुमान गरिएको छ ।
प्रधानमन्त्री ओलीले न्यूयोर्कमा भेट्दा पनि मोदीलाई नेपाल भ्रमणको निम्तो दिएका थिए । त्यसबेला मोदीले चाँडै नेपाल भ्रमण गर्ने बताए पनि उनको भ्रमण पनि तय हुन सकेको छैन । मोदीले प्रधानमन्त्री ओलीलाई समेत अहिलेसम्म भ्रमणको औपचारिक निम्तो दिएका छैनन् । नेपालले आगामी जेठमा काठमाडौंमा सगरमाथा संवाद गर्दैछ ।
हाल थाइल्यान्ड भ्रमणमा रहेका प्रधानमन्त्री ओली र थाइल्यान्डकी प्रधानमन्त्री पे थोङ् थान् शिनावात्राबीच बुधबार औपचारिक भेटवार्ता सम्पन्न भएको छ । त्यसक्रममा दुई देशका सरकार तथा निजी क्षेत्रबीच विभिन्न सम्झौता एवम् समझदारीपत्रमा हस्ताक्षर भएको छ ।
