नेपाल शिक्षक महासंघले विद्यालय शिक्षा विधेयक असार १५ भित्रै प्रतिनिधिसभाबाट पारित गर्ने सुनिश्चित भएको जनाएको छ। माघ २० गतेदेखि सुरु भएको आन्दोलन विद्यालय शिक्षा विधेयक असार १५ गतेभित्र प्रतिनिधि सभाबाट पारित गरिने सुनिश्चित भएपछि अन्त्य गरिएको महासङ्घले जनाएको छ।
‘२९ दिनसम्म चलेको काठमाडौँ-केन्द्रित शान्तिपूर्ण शैक्षिक सडक आन्दोलन हामी सबैको गौरवको विषय भएको छ’, महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाको संयुक्त हस्ताक्षरमा जारी विज्ञप्तिमा भनिएको छ, ‘यही आन्दोलनको बलमा हामीले विगतमा सहमति भई कार्यान्वयनमा नआएका विषयहरू मन्त्री परिषद्बाट निर्णयमार्फत कार्यान्वयन गराएका छौँ। त्यसैगरी २०८२ असार १५ गते भित्र विद्यालय शिक्षा विधेयक प्रतिनिधि सभाबाट पारित गर्ने सुनिश्चित भएको छ। यसैले यो आन्दोलन अत्यन्त सफल र उपलब्धिमूलक भएको हाम्रो ठहर छ।’
आन्दोलनका क्रममा विद्यालयमा भर्ना अभियान र पठनपाठन अवरुद्ध भएकाले यसको क्षतिपूर्ति हिउँदे वा वर्षे बिदामा हुने गरी काम गर्न शिक्षक महासंघले सबै प्रधानाध्यापक तथा शिक्षक-कर्मचारीलाई अनुरोध पनि गरेको छ। महासङ्घले अब सहमतिहरू कार्यान्वयनमा केन्द्रित हुँदै शैक्षिक सुधारका मुद्दामा सरकारसँग सहकार्य जारी राख्ने संकेत पनि गरेको छ।
