काठमाडौँको नागढुङ्गामा एक ट्राफिक इन्सपेक्टरले प्रहरी जवानलाई थप्पड हानेको घटनापछि दुवै प्रहरीलाई जिम्मेवारीबाट हटाइएको छ।
उक्त घटना सामाजिक सञ्जालमा भिडियोसहित सार्वजनिक भएपछि चासो बढेको थियो। भिडियोमा ट्राफिक प्रहरी निरीक्षकले सुरक्षा ड्युटीमा खटिएका एक जना जवानमाथि हातपात गरेको देखिन्छ। घटना थानकोट नाकास्थलमा भएको बताइए पनि घटनाको मिति खुलाइएको छैन।
काठमाडौँ उपत्यका प्रहरी कार्यालय, रानीपोखरीका प्रहरी वरिष्ठ उपरीक्षक (एसएसपी) तथा प्रवक्ता शेखर खनालले घटनाको पुष्टि गर्दै कुटपिटमा संलग्न इन्सपेक्टर र कुटाइमा परेका जवान दुबैलाई प्रारम्भिक रूपमा जिम्मेवारीबाट हटाइएको जानकारी दिए।
उनका अनुसार, ‘भिडियो सार्वजनिक भएपछि तुरुन्तै छानबिन सुरु गरिएको छ। अनुशासनहीनता देखिएको खण्डमा कडा कारबाही हुनेछ।’
घटनाले प्रहरी संगठनभित्रको अनुशासन, कार्यशैली र आन्तरिक सम्बन्धमाथि प्रश्न उठाएको छ। सामाजिक सञ्जालमा आलोचनासँगै प्रहरीप्रति जनविश्वासमा असर पर्ने अवस्था देखिएको भन्दै सरोकारवालाहरूले निष्पक्ष छानबिन र पारदर्शी कारबाहीको माग गरेका छन्।
उक्त प्रकरण अहिले अनुसन्धानको चरणमा रहेको र आवश्यक निर्णय छानबिन प्रतिवेदनपछि हुने प्रहरीले जनाएको छ।
