उपत्यकामा आज (बिहीबार) गणतन्त्रवादी र राजावादीले आफ्नो शक्ति प्रदर्शन गर्ने भएका छन् । दुवै समूहले प्रदर्शनका लागि व्यापक तयारीसमेत गरेका छन् ।
सत्ताको नेतृत्व गरिरहेको नेकपा एमाले र राजतन्त्र फर्काउनुपर्छ भनेर लबिइङ गरिरहेका राजावादी समूहले आज गणतन्त्र दिवसका अवसर पारेर उपत्यकामा शक्ति प्रदर्शन गर्न लागेका हुन् । प्रदर्शनका क्रममा सम्भावित अप्रिय घटना रोक्न तथा सुरक्षा व्यवस्था मजबुत बनाउनका लागि जिल्ला प्रशासन कार्यालय काठमाडौंले सत्तारुढ एमाले र राजावादी समूहको प्रदर्शनका लागि छुट्टाछुट्टै समय तोकेको छ ।
जिल्ला सुरक्षा समितिको बुधबारको बैठकले एमालेलाई दिउँसो २ बजेसम्म गणतन्त्र दिवसको उत्सव मनाउन अनुमति दिएको छ । त्यसपछि भने राजावादी समूहलाई प्रदर्शनको समय निर्धारण गरिएको हो ।
दुवै पक्षले रत्नपार्क क्षेत्रलाई केन्द्र बनाएर कार्यक्रम गर्ने अडान लिएपछि प्रमुख जिल्ला अधिकारी ऋषिराम तिवारीको संयोजनमा एमालेलगायत राप्रपा अध्यक्ष राजेन्द्र लिङ्देनसँग छलफल गरेर समय निर्धारण गरिएको हो ।
राजावादीले संघीयता खारेज, राजतन्त्र र हिन्दू राष्ट्र पुनःस्थापनाजस्ता मागसहित सात ठाउँबाट र्याली निकाल्ने तयारी गरेका छन् । हरेक प्रदेशबाट छुट्टाछुट्टै र्यालीसहित शीर्ष नेताहरूको नेतृत्व रहनेछ ।
काठमाडौं प्रहरी प्रमुख एसएसपी विश्वराज अधिकारीले सम्भावित अप्रिय घटना रोक्न कडा सुरक्षा व्यवस्था मिलाइएको जनाएका छन् । ‘कानुनअनुसारका कार्यक्रमलाई सुरक्षा दिने र उल्लंघन भए कारबाही हुनेछ,’ उनले भने ।
एमाले सांस्कृतिक कार्यक्रममार्फत गणतन्त्र उत्सव मनाउने तयारीमा छ । राजावादीले भने सोही स्थानमा अहिलेको शासन व्यवस्थाविरुद्ध आक्रोश पोख्ने तयारीमा छन् ।
