मधेस प्रदेशमा परेको सुक्खाका कारण खानेपानीको चरम अभाव सिर्जना भएपछि प्रदेश सरकारले प्रभावित क्षेत्रहरूमा राहतस्वरूप ८ वटा वारुणयन्त्र परिचालन गरेको छ।
मुख्यमन्त्री सतिशकुमार सिंहका अनुसार वारुणयन्त्रहरू २४ घण्टा सञ्चालनमा रहने छन्, जसको व्यवस्थापन प्रदेश सरकारले गर्नेछ भने सञ्चालन नेपाली सेनाले गर्नेछ।
प्रत्येक वारुणयन्त्र ५ हजार लिटर क्षमताको भएको र एकैपटक ४० हजार लिटर पानी आपूर्ति गर्न सक्ने जनाइएको छ। खानेपानीको चरम संकट समाधान गर्न वीरगञ्जलगायतका अति प्रभावित क्षेत्रहरूमा यी वारुणयन्त्र खटाइएका हुन्।
यसअघि तीन वटा ट्याङ्कर वन कार्यालयमार्फत पानी आपूर्ति भइरहेकोमा अब थप ७ वटा ट्याङ्कर र एउटा अतिरिक्त वारुणयन्त्र पनि नेपाली सेनाबाट पठाउने तयारी भइरहेको छ।
मुख्यमन्त्री सिंहले प्रदेश सरकार जनताको पीडामा साथ रहेको उल्लेख गर्दै संघीय सरकार, स्थानीय तह र दातृ निकायसँग समन्वय गर्दै स्रोत र साधनको अधिकतम उपयोगमार्फत राहत पुर्याउने प्रयास भइरहेको बताए।
साउन लागिसक्दा पनि पानी नपरेकोले जलस्रोतहरू सुक्दै गएका छन्। जसका कारण रोपाइँ ठप्प छ भने दैनिक उपभोगका लागि पनि पानी अभाव भएको छ। संकट गहिरिँदै गएपछि प्रदेश सरकारद्वारा सबै संयन्त्र र स्रोत परिचालन गरिएको हो।
