सकारले अनियमिततासँग जोडिएका उजुरीपछि सवारी परीक्षण कार्यालय इटहरीका प्रमुख र लेखापालको जिम्मेवारी खोसेको छ ।
भौतिक पूर्वाधार तथा यातायात मन्त्रालयले कार्यालय प्रमुख रोशनकुमार देव र लेखापाल चन्द्रबहादुर बस्नेतलाई आइतबार मन्त्रालयमा तानेको हो। सेवाग्राहीसँग घुस माग्ने, अनावश्यक हैरानी दिने, र राजस्व हिनामिनामा संलग्न भएको आशंका सम्बन्धी उजुरीहरू परेपछि मन्त्रालयले यो कदम चालेको हो।
प्रमुख र लेखापालको मिलेमतोमा कार्यालयमा व्यापक अनियमितता भइरहेको गुनासो प्रमाणसहित मन्त्रालयमा परेका थिए। उजुरी ऊर्जा, जलस्रोत तथा सिँचाइ, भौतिक पूर्वाधार तथा यातायात, र सहरी विकास मन्त्रालय सम्म पुगेपछि उच्च तहले तत्काल कारबाही प्रक्रिया अघि बढाएको हो।
मन्त्रालयले घटनाको विस्तृत छानबिन गर्न भौतिक पूर्वाधार तथा यातायात मन्त्रालयका प्रशासन महाशाखा प्रमुख बलराम रिजालको संयोजकत्वमा पाँच सदस्यीय छानबिन समिति गठन गरेको छ। छानबिन समितिले केही दिनभित्र तथ्य संकलन गरी प्रतिवेदन पेस गर्ने बताइएको छ। मन्त्रालयले दोषी ठहरिने कर्मचारीविरुद्ध आवश्यक प्रशासनिक कारबाही गर्ने जनाएको छ।
