नेपाली काँग्रेसको १५औँ महाधिवेशन आज काठमाडौंको टुडिखेल खुलामञ्चमा उदघाटन हुँदैछ ।
भोलि र पर्सि बन्दसत्र सञ्चालन हुनेछ ।
महाधिवेशनको बन्दसत्र पनि खुलामञ्चमै हुने जनाईएको छ । बन्दसत्रको छलफल हुने प्रत्येक हलमा डिजिटल बोर्ड राखिएको छ ।
एउटा हलमा भएको छलफललाई अर्को हलमा रहेका सहभागीहरुले पनि डिजिटल बोर्डमार्फत प्रत्यक्ष रूपमा हेर्न र सुन्न सक्ने व्यवस्था मिलाइएको काँग्रेसका प्रवक्ता देवराज चालिसेले जानकारी दिए ।
यस व्यवस्थाले ठूलो संख्यामा प्रतिनिधि सहभागी हुने बन्दसत्रमा प्रतिवेदनमाथिको छलफललाई सहज रूपमा पछ्याउन सकिने काँग्रेसको अपेक्षा छ ।
बन्दसत्रमा सभापति, उपसभापति, महामन्त्री र कोषाध्यक्षले अलग–अलग प्रतिवेदन प्रस्तुत गर्नेछन् ।
ती प्रतिवेदनमाथि भूगोलका आधारमा प्रतिनिधिलाई समूह विभाजन गरी छलफल गराउने तयारी काँग्रेसको छ ।
बन्दसत्रमा ७ हजार ५ सयभन्दा बढी प्रतिनिधि सहभागी हुने भएकाले एउटा हलमा करिब ३ हजार प्रतिनिधि अट्ने गरी तीनवटा हलको तयार पारिएको नेपाली काँग्रेसले जनाएको छ ।
महाधिवेशनको उद्घाटन सभापति गगन कुमार थापाले गर्ने उद्घाटन सत्रमा काँग्रेसका शीर्ष नेताहरूका साथै मुलुकका प्रमुख राजनीतिक दलका शीर्ष नेताहरूको समेत सम्बोधन हुने बताइएको छ ।
शनिबारदेखि पार्टी केन्द्रीय कार्यालय सानेपामा महाधिवेशन प्रतिनिधिको दर्ता प्रक्रिया सुरु भएको छ । महाधिवेशन प्रतिनिधिले सहभागिता दर्ताबापत तीन हजार ५ सय रुपैयाँ बुझाउनुपर्ने व्यवस्था गरिएको निर्वाचन समितिले जनाएको छ ।
