चर्चित कथावाचक साईग्रेस पोखरेलले आफ्नो कथावाचन यात्रा र यस क्षेत्रमा हासिल गरेका उपलब्धिलाई समेटेर नयाँ पुस्तक ‘साईग्रेस : द स्टोरी टेलर’ सार्वजनिक गरेका छन् ।
यो विमोचन उनको १००औं लाइभ प्रस्तुतिसँगै संयुक्त राज्य अमेरिकाको कोलोराडोमा सम्पन्न भएको हो ।
पुस्तक विमोचन समारोहमा नेपाली सांगीतिक क्षेत्रका हस्ती एवं लेखक हीरण्य भोजपुरे, अमेरिकाका लागि नेपालका सद्भावनादूत विनोद अधिकारी, ग्लोबल नेपाल फिल्म अवार्ड अमेरिकाका अध्यक्ष नवराज श्रेष्ठ, ख्यातिप्राप्त सङ्गीतकार मनोजराज शिवाकोटी र कोलोराडो कार्यक्रमका आयोजक सुमन केसीलगायत व्यक्तित्वको उपस्थिति थियो ।
‘साईग्रेस : द स्टोरी टेलर’ पुस्तकले कथा वाचनको विश्वव्यापी इतिहासका साथै साईग्रेसका विश्वभरका प्रस्तुतिहरूका अविस्मरणीय क्षणहरूलाई प्रस्तुत गरेको छ । यसले उनको कथावाचनले दर्शकमा पारेको प्रभावको पनि विश्लेषण गरेको छ । पुस्तकको एक प्रमुख आकर्षण उनको बहुचर्चित अडियो उपन्यास ‘मेरो अधुरो प्रेम’ हो, जुन युट्युबमा हालसम्म ६६ लाखपटक हेरिएको छ ।
पुस्तकमा साईग्रेसले आफ्नो कथा वाचन यात्राका व्यक्तिगत अनुभव र आत्म निरीक्षणहरूलाई पनि समेटेका छन् । उनले विभिन्न दर्शकसँगको अन्तर्क्रियाका मर्मस्पर्शी कथाहरू बाँडेका छन्, जसमा एक स्रोताले उनको एउटा कथा सुनेर आत्महत्याको विचार त्यागेर आशाको नयाँ किरण पाएको बताउँदाको शक्तिशाली क्षण पनि समावेश छ ।
यो प्रकाशनमार्फत साईग्रेसले आफ्नो कथावाचकको रूपमा भएको व्यक्तिगत विकासलाई मात्र झल्काएका छैनन्, बरु जीवनलाई स्पर्श गर्ने र परिवर्तनलाई प्रेरित गर्ने कथा वाचनको परिवर्तनकारी शक्तिलाई पनि जोड दिएका छन् ।
