क्यानडाका प्रधानमन्त्री जस्टिन ट्रुडोले सत्तारुढ लिबरल पार्टीका नेता तथा प्रधानमन्त्री पदबाट राजीनामा दिएका छन् । लिबरल पार्टीको नयाँ नेता चयन नभएसम्म ट्रुडो प्रधानमन्त्री रहनेछन् ।
ट्रुडोले पार्टीको नेताबाट राजीनामा दिएको र अर्को नेता चुनिएपछि प्रधानमन्त्री पदबाट राजीनामा दिने बताएका छन् ।
जस्टिन ट्रुडोले सोमबार बिहान (स्थानीय समयअनुसार) पत्रकार सम्मेलनमा राजीनामाको घोषणा गर्दै भने, ‘प्रत्येक दिन प्रधानमन्त्रीका रूपमा सेवा गर्न पाउनु सम्मानको कुरा हो । हामीले महामारीको समयमा सेवा गर्यौं, बलियो लोकतन्त्रका लागि काम गर्यौं, राम्रो व्यापारको लागि काम गर्यौं । सबैलाई थाहा छ म लडाकु हुँ ।’
जस्टिन ट्रुडोले भने, ‘२०१५ मा प्रधानमन्त्री भएदेखि मैले क्यानडा र यसको हितको रक्षा गर्न काम गरेको छु । मैले मध्यम वर्गलाई बलियो बनाउन काम गरेको छु । हामीले देशलाई महामारीको समयमा एक-अर्कालाई सहयोग गरेका छौं ।’
मार्च २४ सम्म संसद् स्थगन गर्न आह्वान गर्दै उनले भने, ‘देशलाई अर्को चुनावमा राम्रो विकल्प चाहिन्छ । यदि तिनीहरूले आन्तरिक लडाइँ लड्न जारी राखे भने, क्यानाडामा मतपत्रमा रहेका मानिसहरूका लागि तिनीहरू उत्तम विकल्प नहुन सक्छ ।’
यस क्रममा ट्रुडोले प्रधानमन्त्रीका रूपमा आफ्ना उपलब्धिहरू पनि उल्लेख गरे । उनले सन् २०१५ मा सत्ता ग्रहण गर्दाको तुलनामा क्यानडाको अवस्था राम्रो रहेको दाबी गरे ।
जस्टिन ट्रुडोको स्थान कसले लिने ?
लिबरल पार्टीको गभर्निङ लिडरबाट जस्टिन ट्रुडोले राजीनामा दिएको घोषणा गरेपछि उनको ठाउँमा पार्टीको नेता को बन्ने भन्ने चर्चा चर्किएको छ ।
टोरन्टोका सांसद तथा पूर्वउपप्रधानमन्त्री क्रिस्टिया फ्रिल्यान्डको नाम शीर्ष दाबेदारमा परेको छ । यो सूचीमा पूर्व केन्द्रीय बैंकर मार्क कार्नीको नाम पनि छ । ट्रुडो आफैंले स्वीकार गरे कि उनी कार्नीलाई आफ्नो टोलीमा समावेश गर्न चाहन्छन् ।
यो सूचीमा यातायातमन्त्री अनिता आनन्दको नाम पनि छ । क्यानडाकी विदेशमन्त्री मेलानी जोलीको नाम पनि छ ।
योसँगै जस्टिन ट्रुडोको नौ वर्षको शासनको अन्त्य हुँदै छ ।
मतदाताहरूमाझ जस्टिन ट्रुडोको घट्दो लोकप्रियताका कारण लिबरल पार्टीभित्रबाट राजीनामा दिन दबाब आएको बताइएको छ ।
क्यानडामा यसै वर्षको अक्टोबरअघि चुनाव हुने भएको छ ।
ट्रुडोले केही समयदेखि विदेशी मोर्चामा मात्र संघर्ष गर्दै आएका छैनन्, घरेलु राजनीतिमा पनि धेरै कठिनाइको सामना गर्नुपरेको छ ।
उनको पार्टी चुनाव हार्न सक्ने भन्दै सर्वे भएका छन् ।
चाखलाग्दो कुरा के छ भने छिमेकी देश अमेरिकामा ट्रम्पले जनवरी २० मा राष्ट्रपतिको जिम्मेवारी सम्हाल्न लागेका बेला ट्रुडोले राजीनामाको घोषणा गरेका छन् । वास्तवमा ट्रम्पले क्यानडामा २५ प्रतिशत ट्यारिफ लगाउने धम्की दिएका छन् ।
ट्रम्पको यस्तो चेतावनीपछि ट्रुडो उनलाई भेट्न अमेरिका गए तर कुनै आश्वासन पाएनन् । ट्रम्पले पनि क्यानडालाई ५१औ राज्यको रूपमा उल्लेख गर्न थाले । वास्तवमा, क्यानाडाको कुल निर्यातको ७५ प्रतिशत अमेरिकामा हुन्छ । यस्तो अवस्थामा क्यानडामा २५ प्रतिशत ट्यारिफ निकै भारी हुनेछ ।
ट्रुडोको राजीनामाको खबर आएदेखि नै भारतसँगको सम्बन्धमा आएको तनावले उनको लोकप्रियतामा पनि केही हदसम्म आघात पुर्याएको समाचारहरु प्रकाशन भएका छन् । -बीबीसी
