काठमाडौंको चक्रपथ-सुकेधारा भएर गुडिरहेका ४० वटा डिजेलका सवारीसाधनको प्रदूषण जाँच गर्दा ७८ प्रतिशत अर्थात् ३१ वटा फेल भेटिए ।
पुस २९ गतेबाट थालिएको जाँचका क्रममा आज (सोमबार) सम्म डिजेलबाट चल्ने १४० वटा र पेट्रोलबाट चल्ने २० गरी १६० वटा सवारी साधनको जाँच भएको छ । यीमध्ये डिजेलबाट चल्ने ९४ र पेट्रोलबाट चल्ने ६ सवारीसाधन फेल भएका छन् ।
माघ ६ गते टेकुमा जाँच गरिएका ४० सवारीसाधनमध्ये ३३ वटा फेल भएका भेटिए । माघ ४ गते सिनामंगल क्षेत्रमा २० वटा सवारीसाधनको चेकजाँच गर्दा १० वटा प्रदूषण मापदण्डबाहिरका पाइए । माघ ३ गते पानीपोखरी क्षेत्रमा २० सवारीसाधनको चेकजाँच गर्दा १४ वटा फेल भएका साधन थिए ।
माघ २ गते जमल क्षेत्रमा २० वटाको जाँच गर्दा ६ वटा फेल थिए । पुस २९ गते बबरमहलमा २० वटा परीक्षण गर्दा ६ वटा फेल थिए । यसरी गरिएको परीक्षणमा मापदण्डबाहिर रहेका सवारीसाधनलाई मर्मत गर्न, त्यसपछि पुनः परीक्षण गराउन र मापदण्डभित्र मात्र सञ्चालन गर्न कबुलियतनामा गराइएको छ ।
वायु प्रदूषण नियन्त्रणका प्रयासमध्ये सवारीसाधनबाट निस्कने प्रदूषक तत्त्व न्यूनीकरण तथा नियन्त्रणका लागि महानगरपालिकाको वातावरण व्यवस्थापन विभागले नेपाल सरकारको वातावरण विभाग, उपत्यका ट्राफिक प्रहरी कार्यालय र महानगर प्रहरी बलसँगको सहकार्यमा स्थलगत चेकजाँच गरिरहेको छ ।
