सञ्चार तथा सूचना प्रविधिमन्त्री पृथ्बी सुब्बा गुरुङले संसदबाट अध्यादेश पास गर्न सरकारले राजनीतिक दलहरुबीच सहमति जुटाउने काम गरिरहेको बताएका छन् ।
मन्त्रालयमा बुधबार मन्त्रिपरिषद् बैठकका निर्णय सार्वजनिक गर्न आयोजित कार्यक्रममा उनले संसद्मा टेबुल भएका अध्यादेशहरु पारित गर्न सहमतिको प्रयास भइरहेको बताए । उनले सरकार अध्यादेशहरुलाई राष्ट्रिय सहमतिको आधारमा पास गर्न चाहिरहेको पनि बताए । अध्यादेशका बारेमा छलफल र सहमतिको प्रयास जारी रहेको उल्लेख गर्दै निष्क्रिय हुने वा पारित हुने भन्ने परिस्थिति बनि नसकेको मन्त्री गुरुङको भनाइ छ । उनले संघीय संसद्का दुवै सदनबाट बहुमतले पास हुने स्थिति बनेपछि मात्रै अध्यादेशको छलफल अगाडि बढ्ने उनको भनाइ छ ।
‘अहिले हामीले ल्याएका सबै अध्यादेश संसद्मा टेबुल गरिसकेका छौं । यसमा पनि राजनीतिक दलहरुबीचमा सहमति हुनुपर्यो नि । अहिले त्यसका लागि सहमति जुटाउने कामहरु हुँदै छन् । हामी सकभर राष्ट्रिय सहमतिका आधारमा अध्यादेश पास गर्न चाहन्छौं । त्यसो भयो भने मात्र बहुमतका आधारमा जाने हो,’ उनले भने, ‘अहिले यो विषय छलफलकै क्रममा रहेको हुनाले यो पास हुने भो अथवा फेल हुने भो भन्ने परिस्थिति बनिसकेको छैन । हाम्रो संवैधानिक प्रावधानअनुसार संसद्का दुवै सदनबाट पारित हुनुपर्नेछ । दुवै सदनबाट पास हुने कुराको सबै राजनीतिक दलहरुका बीचमा सहमति भएपछि अध्यादेशबारे छलफल अगाडि बढाउँछौं ।’
उनले प्रतिनिधिसभामा दर्ता भएको सामाजिक सञ्जालसम्बन्धी विधेयक सरकारले फिर्ता नलिने बताए । उनले विधेयकका सम्बन्धमा आवश्यक निर्णय र संशोधन संसद्ले नै गर्ने भएको कारण फिर्ता लिने कुरा नभएको जनाए । सामाजिक सञ्जालको नियमन जरुरी रहेको भन्दै उनले सबै टेलिभिजन र रेडियाहरुलाई कानुन लाग्ने अनलाइनहरुलाई नलाग्ने हो ? भन्दै प्रतिप्रश्नसमेत गरे ।
‘सामाजिक सञ्जालसम्बन्धी विधेयकका सम्बन्धमा संसद्ले जे निर्णय गर्छ । जसरी विधेयक संशोधन गरेर ल्याउँछ त्यो संसद्ले नै गर्ने हो । अहिले उठेका सबै कुराको पनि संसद्मै छलफल हुन्छ । विधेयक फिर्ता लिने कुरा हुँदैन,’ उनले भने, ‘सामाजिक सञ्जाल साँच्चै नियमन गर्न जरुरी छैन त ? सबै टीभी र रेडियोहरुलाई नियम लाग्ने तर अनलाइन टीभीहरुलाई नियम र कानुन नलाग्ने हो र ? यी सबै कुराहरुको पालना गराउन सामाजिक सञ्जालसम्बन्धी कानुन अत्यन्तै आवश्यक छ ।’
अनलाइन सञ्चारमाध्यम र सामाजिक सञ्जालको नियमन जरुरी भएको कारण सरकारले विधेयक ल्याएको उनको भनाइ छ ।
