तिब्बत भूकम्प : मृतकको संख्या १२६ पुग्यो, १८८ जना घाइते

चीनको तिब्बतमा गएको भूकम्पमा परी मृत्यु हुनेको संख्या १२६ पुगेको छ । चिनियाँ सञ्चारमाध्यमहरुका अनुसार चीनको सिजाङ स्वशासित क्षेत्रको डिङ्ग्री काउन्टीमा मंगलबार बिहान गएको भूकम्पमा परी घाइते हुनेको संख्या १८८ पुगेको छ ।

स्थानीय समयअनुसार नेपालको उत्तरपूर्वी सीमानजिकै चीनको सिजाङ स्वशासित क्षेत्रको डिङ्ग्री काउन्टी केन्द्र भएर मंगलबार बिहान भूकम्प गएको हो । भूकम्प मापनसम्बन्धी चीनको आधिकारिक निकाय चाइना अर्थक्वेक नेटवर्क्स सेन्टरका अनुसार स्थानीय समयअनुसार बिहान ९ बजेर ५ मिनेट जाँदा ६.८ म्याग्निच्युडको भूकम्प गएको हो । सेन्टरका अनुसार भूकम्पको उद्गम बिन्दु(गहिराइ) १० किलोमिटर रहेको छ ।

भूकम्पको केन्द्रबिन्दुको ५ किलोमिटर आसपासमा ७ वटा गाउँ छन् । त्यस्तै केन्द्रविन्दुको २० किलोमिटर आसपासमा भने दुईवटा सहर रहेका छन् । भूकम्पका कारण भवनहरू भत्किएको भिडियो र तस्बिरहरूसमेत सार्वजनिक भएका छन् । चिनियाँ सञ्चारमाध्यमहरूका अनुसार भूकम्प प्रभावित क्षेत्रमा राहत र उद्धार टोली खटिइसकेका छन् ।

यूएस जियोलोजिकल सर्भेले भने उक्त भूकम्पको मापन ७.१ म्याग्निच्युड रहेको जनाएको छ । नेपालको राष्ट्रिय भूकम्प मापन केन्द्रले ७.० म्याग्निच्युडको भूकम्प गएको जनाएको छ । भूकम्पको धक्का नेपालका विभिन्न जिल्लासँगै भुटानको थिम्पु, भारतको बिहार र बंगलादेशसम्म पनि महसुस गरिएको समाचारहरू आएका छन् ।

चिनियाँ राष्ट्रपति सी चिनफिङले पनि भूकम्प प्रभावित क्षेत्रमा उद्धारका लागि खटिएर क्षति न्यूनीकरण गर्न निर्देशन दिएका छन् । सयौंको संख्यामा सुरक्षाकर्मीहरू परिचालन भएका छन् ।

भूकम्प नेपालमा पनि धक्का महसुस भएको थियो । काठमाडौं उपत्यकालगायत विभिन्न ठाउँमा मानिसहरू घरबाहिर निस्किएका थिए । काठमाडौंको स्‍युचाटारमा एक पुरुषले घरको छतबाट हाम फालेर घाइते भएका छन् । अन्य केही घरहरूमा सामान्य क्षति भएको प्रहरीले जनाएको छ ।

यस्तै भूकम्पका कारण सोलुखुम्बुको थुलुङ दूधकोशी गाउँपालिका र खुम्बु पासाङल्हामु गाउँपालिकामा दुईवटा घरमा क्षति पुगेको छ ।

थुलुङ दूधकोशी ७, देउसा लुरुवाका ५० वर्षीय हर्कबहादुर खत्रीको ढुंगामाटोको गारो र ढुंगाकै छानो भएको दुईतले घरमा क्षति पुगेको प्रहरीले जनाएको छ ।

खुम्बु पासाङल्हामु गाउँपालिका ५, हेलाजुङ बस्ने आङङिमा शेर्पाको ढुंगा,माटो र टिनको छानाको दुईतले घरमा क्षति पुगेको प्रहरी नायब उपरीक्षक द्वारिकाप्रसाद घिमिरेले जानकारी दिए ।

भूकम्पले सोलुखुम्बुको सगरमाथा राष्ट्रिय निकुञ्जको थामे पोस्ट कार्यालय भवनमा पनि क्षति पुगेको छ । खुम्बु पासाङ ल्हामु गाउँपालिका ५, थामेत्याङस्थित निकुञ्जको भवनमा भूकम्पका कारण चिरा परेको निकुञ्जका प्रमुख संरक्षण अधिकृत सुष्मा रानाले जानकारी दिइन् ।

यो पनि...

भूकम्पबाट सगरमाथा राष्ट्रिय निकुञ्जको भवनमा क्षति

तिब्बत भूकम्प : उद्धार र राहतमा हरसम्भव प्रयास गर्न चिनियाँ राष्ट्रपतिको निर्देशन

काठमाडौंमा भूकम्पको धक्का महसुस

तिब्बतसँग सिमाना जोडिएका जिल्लामा भूकम्पले क्षति पुर्‍याएको अनुमान, विवरण संकलन गरिँदै

भूकम्पपछि चीनको सिजाङ स्वायत्त क्षेत्रमा क्षतिग्रस्त घरहरूमा उद्धार हुँदै (फोटो सहित)

भूकम्पले सोलुखुम्बुमा दुई घरमा क्षति

तिब्बतमा गएको शक्तिशाली भूकम्पमा ५३ जनाको मृत्यु

भूकम्पबाट सुरक्षित रहन प्रधानमन्त्री ओलीको आग्रह