संसद्को गतिरोध हटाउनका लागि सभामुख देवराज घिमिरेले दलका प्रमुख सचेतकहरुसँग छलफल गरेका छन् ।
संसद् भवन नयाँ बानेश्वरमा भएको छलफलमा सभामुख घिमिरेले राजनीतिक दलका प्रमुख सचेतकहरू गरेको छलफलमा दुई दिनअघि भएको तीनकुने घटना लोकतन्त्रमाथिको प्रहार भएकाले संसद्मा छलफल र बहस गर्ने वातावरण बनाउन दलहरूलाई आग्रह गरेको घिमिरेको सचिवालयले जनाएको छ ।
घिमिरेका प्रेसविज्ञ शेखर अधिकारीका अनुसार सभामुखले राष्ट्रमाथि भएको घटनाबारे छलफल गरेर संसद् जीवन्त रहेको महसुस गराउन अपिल गरे । अधिवेशन सञ्चालन नभएको अवस्थामा पनि सदन सञ्चालन गर्नुपर्ने अवस्थामा सदन अवरोध कुनै पनि हालतमा उचित नहुने सभामुख घिमिरेको भनाइ छ ।
बैठकमा एमाले मुख्य सचेतक महेशकुमार बर्तौलाले प्रधानमन्त्रीले भोलि १८ गतेको बैठकमा सम्बोधन गर्ने जानकारी गराए । उनले संसद् अवरोध खुलाउने विषयमा प्रधानमन्त्री र विपक्षी दलका नेताबीच टेलिफोन संवाद भएको जानकारीसमेत दिएका थिए ।
प्रधानमन्त्रीले आजै सर्वदलीय बैठक बोलाएको पनि बर्तौलाले जानकारी दिए । उसो त प्रधानमन्त्रीको सचिवालयले पनि आज साँझ ७ बजे सर्वदलीय बैठक आह्वान गरिएको जनाएको छ । प्रधानमन्त्रीको सचिवालयले भनेको छ, ‘प्रधानमन्त्रीको आह्वानमा गणतन्त्र पक्षधर दलहरूको बैठक आज साँझ ७ बजे सिंहदरबारमा बस्ने कार्यक्रम रहेको छ ।’
सभामुखसँगको छलफलमा सत्तापक्षले सदन अवरोध खुलाउन विपक्षी दललाई अनुरोध गरेको छ । उता विपक्षी दलहरुले भने आफ्नो अडान यथावत् रहेको जनाएका छन् ।
विपक्षी दलहरूले सरकारले नेपाल विद्युत् प्राधिकरणका कार्यकारी निर्देशक कुलामान घिसिङलाई हटाएकोबारे प्रधानमन्त्री केपी ओलीले सदनमा जवाफ दिनुपर्ने माग गर्दै बुधबारबाट प्रतिनिधिसभामा अवरोध गर्दै आएका छन् । यसअघि जवाफ नदिने बताएका प्रधानमन्त्री ओलीले सोमबार प्रतिनिधिसभामा जवाफ दिने जानकारी गराएका हुन् ।
