सत्तारुढ नेकपा एमालेले सत्ता साझेदार नेपाली कांग्रेसलाई संघीय निजामती विधेयकबारे आफ्ना सांसदहरुको संशोधन प्रस्ताव स्वतन्त्र रुपले राखेको बताएको छ ।
राष्ट्रिय सभामा रहेको निजामती विधेयकमा कुलिङ पिरियड हटाउनेबारे एमाले सांसदहरुले संशोधन प्रस्ताव दर्ता गराएका छन् । यसबारेमा संसद्मा बहस भइरहेको छ ।
कांग्रेसको जिज्ञासामा आफ्ना सांसदहरु संशोधन हाल्न स्वतन्त्र रहेको कुरा एमालेले बताएको कांग्रेसका प्रमुख सचेतक श्यामकुमार घिमिरेले जानकारी दिए । पार्टी सभापति शेरबहादुर देउवाको निवास बूढानीलकण्ठमा शुक्रबार बिहान बसेको बैठकपछि सञ्चारकर्मीहरुसँग घिमिरेले कुलिङ पिरियडमा एमाले सांसदहरुको संशोधनबारे बुझ्दा एमालेले संशोधनका लागि सांसदहरु स्वतन्त्र रहेको र त्यहीअनुसार संशोधन आएको बताएको जानकारी दिए ।
सरकारले ल्याएकै भूमि ऐनमा पनि काँग्रेसका केही सांसदहरुले संशोधन राखेकाले यसलाई सामान्य रुपमा बुझ्नुपर्ने घिमिरेको भनाइ छ । ‘उहाँहरुको समग्र पार्टीको तर्फबाट कुरा के आएको छ भने सांसदहरुले आफ्नो ढंगले संशोधन प्रस्ताव राखे । सांसदहरु स्वतन्त्र हुन्छन् । आफ्नो संशोधनहरु राख्न स्वतन्त्र हुन्छन्,’ घिमिरेले भने, ‘भूमि ऐनमा हाम्रा १०/१२ जना सांसदहरुले राख्नुभयो । तर त्यो सरकारबाटै आएको थियो । सरकारबाटै आएको विधेयकमा पनि राख्ने प्रचलन भएकाले राखिएको हो भन्ने छ । छलफल गरेर अघि बढ्ने विषय छ ।’
कुलिङ पिरियडबारे थप छलफल गरेर टुंग्याइने पनि प्रमुख सचेतक घिमिरेले जानकारी दिए ।
