नेपाली कम्युनिस्ट पार्टी (नेकपा) का सांसद युवराज दुलालले सरकारलाई संविधानको मर्मअनुसार काम गर्न आग्रह गरेका छन्। सोमबार बसेको प्रतिनिधिसभा बैठकमा बोल्दै उनले काम गरेको देखाउने नाममा ‘स्टन्ट’ गरेर समय बर्बाद नगर्न सरकारको ध्यानाकर्षण गराए।
सांसद दुलालले नेपालको संविधानले समाजवादउन्मुख राज्यव्यवस्था निर्माण गर्ने स्पष्ट संकल्प गरेको उल्लेख गर्दै त्यसअनुसार नीति तथा कार्यक्रम अघि बढाउनुपर्नेमा जोड दिए।
उनले भने, ‘युवाहरूले यो व्यवस्थाका विरुद्ध होइन, आफ्नो अवस्थाका विरुद्ध संघर्ष गरेका हुन्। समाजमा मौलाउँदै गएको विकृति, विसंगति र भ्रष्टाचारविरुद्ध उनीहरूले आवाज उठाएका हुन्। नवयुवाहरूले आम नागरिकको भावनालाई प्रतिनिधित्व गर्दै विद्रोह गरेका थिए।’
दुलालले सरकारलाई संविधानको मूल भावना बुझेर समाजवादउन्मुख राज्य निर्माणतर्फ ध्यान केन्द्रित गर्न आग्रह गर्दै जनअपेक्षा अनुसार काम गर्नुपर्ने आवश्यकता औंल्याए।
