काठमाडौं, चैत २४ :
नेपाली कम्युनिस्ट पार्टीका नेता युवराज दुलालले हालैको प्रतिनिधिसभा निर्वाचनमा पार्टी पराजय हुनुमा आन्तरिक कारण नै बढी रहेको बताएका छन्।
मंगलबार संसद भवन सिंहदरबारमा सञ्चारकर्मीसंग कुरा गर्दै दुलालले फागुन २१ गते निर्वाचनमा पराजय हुनुमा आन्तरिक कारण बढी रहेको र अरुलाई दोष ठाँउ नरहेको बताए ।
त्यस्तै देशभित्र र बाह्य परिस्थितिलाई बुझ्न नसक्नु र समयमा नै उचित पहल लिन नसक्नु पराजयको अर्को कारण रहेको उनले बताए। त्यस्तै दुलालले भ्रष्टाचार र सुशासनका लागि पार्टीले गरेको राम्रा कामको जानकारी जनतालाई गराउन नसकिएको धारणा राखे ।
उनले पार्टी सदस्य भएर अरुलाई भोट हाल्नेलाई कारबाही हुने स्पष्ट पारे। दुलालले जनताको म्याण्डेड अनुसार वर्तमान सरकार गठन भएकाले सरकारको राम्रा कामलाई सदैव समर्थन हुने धारणा राखे ।
