सिन्धुलीको गोलान्जोर गाउँपालिका-६ का हायु परिवार वडाध्यक्ष रविन श्रेष्ठकै घरमा बस्ने सर्तमा पोखराबाट फर्किएका छन्।
बिरामी हुने भन्दै पहिलेकै घरमा बस्न अस्वीकार गरेपछि वडाध्यक्षले आफ्नै घरमा राख्ने, नयाँ घर बनाउन जग्गा खोज्ने र सहयोग जुटाउने सहमतिसहित १९ जनाको परिवारलाई सोमबार फर्काइएको हो।
गाउँमा असुविधा, स्वास्थ्य उपचारको कठिनाइ र ऋणले थिचिएको जनाउँदै हायु परिवार साउन ८ गते राति पोखरा पुगेको थियो। उनीहरू सुरुमा होटल र गगनगौँडाको दुई घरमा बस्दै आएका थिए। प्रहरीको पहलमा भेटिएपछि वडाध्यक्ष श्रेष्ठले व्यक्तिगत पहलमा सोमबार बिहान पोखरा पुगेर सार्वजनिक र निजी सवारीमार्फत गाउँ फर्काएका हुन्।
परिवारको साढे ८ लाख रुपैयाँ ऋण तिर्न वडाले समन्वय गरी सहयोग गर्ने जनाएको छ। गाउँपालिकाबाट उनीहरूलाई मासिक प्रतिव्यक्ति ४ हजार रुपैयाँ दिइँदै आएको छ।
वडाध्यक्ष श्रेष्ठका अनुसार हायु परिवार तत्काल सुँगुरेमा रहेको आफ्नै पुरानो घरमा बस्नेछन् र पछि नयाँ घरमा स्थानान्तरण गरिनेछ।
